لما يسألك أولادك أو أي حدا عن ذكرى النكبة ... أو شو يعني مسيرة عودة أو شو يعني هذه القرى المهجرة ؟ بكل صراحه جاوبه احكي له حتى يفهم معنى كل هذه الكلمات والمصطلحات اللي مش فاهمها ولو بأبسط الكلمات ....
يابا عندي إلك سؤال شو يعني لاجئ وشو يعني نكبة ؟
لاجئ .... نكبة / بقلم الكاتبة "آمال حمدو حماد "
نكبة يعني لمّا من بلادك طلّعوكْ
تآمروا عليك .....وباعوكْ
منّا وفينا اللي خانوكْ
بـِ شوية ليرات اشتروا
حكّام .....وملوكْ
باعوا أرضْ
ونقضوا عهدْ
من دون ما يعِلموكْ
كرمال كرسي فضيّة
ذهبيّة أو ماسيّة
باعوكْ
هذي أرض جدّكْ
وأبوكْ وأبو أبوكْ
منها هجّروك
من ديارك نفوكْ

بالدّول العربيّة استقبلوكْ
خيمة...وشوية أرض أعطوكْ
ولحتي عن باقي إخوانك يميّزوكْ
بالهويّة لاجئ ...سمّوكْ
وبحقّ رجعة لبلادك وعدوكْ
مقام عالي ومندوب سامي
وحكومة انتداب بريطاني
وسلطان عثماني
صاروا يحكموكْ
ولمّا بدك ترجع لبلادكْ
لأهلك وأحبابك
تشمّ ريحة ترابكْ
بقولولك ما معك إذن، ويمنعوكْ
وتصير تدوّر ع بلادكْ ببلادكْ
وتحكي لأولادك إنّه هذه بلد جدادكْ
وعلى أنقاض بيوتها والحجارة
بنحيي ذكرى بالذاكرة تأبى أن تموتْ
تأبى أن تموتْ ولن تموتْ
                                                                  بقلم الكاتبة/ آمال حمدو حماد